1-bosqich talabalari uchun “Birinchi kurs maktabi” loyihasi doirasida “Tanishuv haftaligi” qiziqarli va mazmunli tarzda davom etmoqda.
Talabalarni universitet hayotiga moslashtirish maqsadida kampusda ular uchun yaratilgan zamonaviy shart-sharoitlar, mavjud imkoniyatlar va universitet infratuzilmasi bilan yaqindan tanishtirilmoqda.
Shuningdek, ta’lim olish, kitobxonlik, bo‘sh vaqtni mazmunli o‘tkazish hamda o‘z salohiyatini rivojlantirish uchun yaratilgan imkoniyatlar haqida ma’lumot berilyapti.
“Vatan bo‘ylab sayohat qil!” shiori ostida tashkil etilgan ma’naviy-ma’rifiy tadbirlar doirasida talabalar Termiz shahridagi tarixiy-madaniy maskanlar hamda “Qatag‘on qurbonlari” muzeyiga tashrif buyurib, xalqimizning boy tarixi, ajdodlarimiz merosi va milliy qadriyatlarimiz haqida qimmatli ma’lumotlarga ega bo‘ldilar.
Shu bilan birga, talabalar ishtirokida profilaktik suhbat va uchrashuvlar o‘tkazilib, ularga talaba sifatidagi huquq va majburiyatlari, xavfsizlik qoidalari yuzasidan tushunchalar berilmoqda.
Talabalar turar joylarida tashkil etilayotgan ko‘ngilochar musiqiy dasturlar esa yangi muhitga moslashish, tengdoshlar bilan yaqinlashish va bo‘sh vaqtni mazmunli o‘tkazishga xizmat qilmoqda.
Birinchi kurs talabalari uchun bu hafta — shunchaki tanishuv emas. Bu yangi muhit, yangi do‘stlar, yangi imkoniyatlar va katta maqsadlar sari tashlangan ilk qadamdir!
