Facebook ijtimoiy tarmog'idagi "Inson huquqlari" nomli profilidagi Termiz davlat universiteti Yuridik fakultetida dars mashg‘ulotlari yuqori haroratli va noqulay sharoitlarda o‘tkazilayotgani haqida tarqatilgan ma’lumotlar yuzasidan quyidagilarni ma’lum qilamiz.
Avvalo, murojaatda keltirilgan Termiz shahrida havo harorati 40–45 darajaga yetgani haqidagi ma’lumotlar haqiqatga to‘g‘ri kelmaydi. Tegishli meteorologik ma’lumotlarga ko‘ra, mazkur davrda Termiz shahrida havo harorati 35 daraja issiqlikdan oshmagan.
Shuningdek, bugungi kunga qadar universitet ma’muriyati, fakultet rahbariyati yoki tegishli mas’ul bo‘limlarga talabalar tomonidan issiqlik ta’siri natijasida sog‘lig‘ida salbiy holat kuzatilgani haqida birorta rasmiy murojaat kelib tushmagan.
Universitetda talabalar uchun munosib ta’lim sharoitlarini yaratish hamda ularning salomatligini muhofaza qilish masalalariga doimiy e’tibor qaratib kelinmoqda. Kelib tushayotgan har bir murojaat belgilangan tartibda o‘rganiladi va zarur choralar ko‘riladi.
Fuqarolar va ijtimoiy tarmoq foydalanuvchilaridan tekshirilmagan ma’lumotlarni tarqatmaslikni hamda faqat rasmiy manbalarga tayanishni so‘raymiz.
