2021-yil 30-dekabrdagi "Respublikada ko‘kalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari to‘g‘risida"gi Prezident farmoniga muvofiq, yurtimizda daraxtzorlarni ko‘paytirishga qaratilgan "Yashil makon" umummilliy loyihasi joriy etildi.
Ayni kunlarda yurtimiz bo‘ylab “Yashil makon” umummilliy loyihasi doirasida “Dolzarb 40 kunlik” tadbirlari keng quloch yozmoqda. Shu maqsadda Termiz davlat universiteti jamoasi ham ko‘kalamzorlashtirish, daraxt va butalarni muhofaza qilish, yashil maydonlarni kengaytirish kabi xayrli ishlarda o‘zining faol hissasini qo‘shishni maqsad qilgan.
Mazkur jarayonlarda universitet mehnat jamoasi ham alohida faollik ko‘rsatgan holda bugun erta tongda universitet qoshidagi akademik litsey hududida hashar o‘tkazildi.
Unda O‘zbekiston Respublikasi Ekologiya va atrof-muhitni muhofaza qilish davlat qo‘mitasi raisi N.Oblomuradov, Termiz davlat universiteti rektori A.Maraximov, nuroniylar, oliygohning professor-o‘qituvchilari va volontyor talabalar ishtirok etishdi.
Loyiha doirasida kuzgi ko‘chat ekish mavsumida va iqlim sharoitidan kelib chiqib akademik litsey hududida 300 dan ortiq manzarali, mevali ko‘chatlarini ekish jarayonlari bo‘lib o‘tdi, shuningdek, ularni parvarishlash bo‘yicha ekspert-mutaxassislar maslahati va tavsiyalari asosida tadbirning barcha qatnashchilari faol ishtirok etishdi.
Ma’lumot o‘rnida aytish kerakki, “Dolzarb 40 kunlik” tadbir doirasida TerDUda umumiy hisobda 3400 dan ortiq mevali va manzarali daraxt ko‘chatlarini hamda terak qalamchalari ekish rejalashtirilgan.
