Termiz davlat universiteti xalqaro maydondagi nufuzini yana bir bor mustahkamlab, nufuzli Times Higher Education (THE) Sustainability Impact Rankings 2026 reytingida yuqori natijaga erishdi.
Reyting natijalariga ko‘ra, universitet dunyoning 1603 ta yetakchi oliy ta’lim muassasasi orasida 401–600-o‘rinlar guruhidan joy oldi. Bu ko‘rsatkich oliygohning BMTning Barqaror rivojlanish maqsadlarini amalga oshirish, ekologik barqarorlikni ta’minlash hamda ta’lim va ilm-fan orqali jamiyat taraqqiyotiga qo‘shayotgan hissasi xalqaro miqyosda e’tirof etilganini ko‘rsatadi.
E’tiborli jihati shundaki, universitet Barqaror rivojlanishning barcha 17 ta maqsadi bo‘yicha baholangan. Xususan, "Arzon va toza energiya" (SDG 7) yo‘nalishi bo‘yicha dunyoda 36-o‘rinni, "Iqlim o‘zgarishiga qarshi kurash" (SDG 13) yo‘nalishi bo‘yicha esa 85-o‘rinni egallab, mazkur sohalardagi eng ilg‘or oliy ta’lim muassasalari qatoridan o‘rin oldi.
Mazkur natijalar Termiz davlat universitetining xalqaro reytinglardagi mavqei tobora mustahkamlanib borayotganini, shuningdek, ilm-fan, innovatsiyalar va barqaror taraqqiyot sohalarida izchil faoliyat yuritayotganini yana bir bor tasdiqlaydi.
