Termiz davlat universiteti - Zamonaviy lingvistika va ilmiy tafakkur uchrashuvi

Termiz davlat universitetida ilmiy hamkorlik va zamonaviy ta’lim integratsiyasiga qaratilgan navbatdagi muhim uchrashuv bo‘lib o‘tdi.

Buxoro davlat universiteti Fransuz filologiyasi kafedrasi professori, filologiya fanlari doktori Ramazon Bobokalonov TerDU Xorijiy filologiya fakultetida ilmiy-amaliy tashrif bilan bo‘lib, “Neyropsixikolingvistikaning hayotimizdagi o‘rni” mavzusida seminar-trening o‘tkazdi.

Seminar davomida til, tafakkur va inson psixologiyasi o‘rtasidagi uzviy bog‘liqlik, zamonaviy lingvistikaning yangi yo‘nalishlari hamda neyropsixikolingvistikaning ilm-fan va ta’limdagi ahamiyati haqida atroflicha fikr yuritildi.

Mashg‘ulotlar magistrantlar, doktorantlar hamda professor-o‘qituvchilar tomonidan katta qiziqish bilan qarshi olindi. Ayniqsa, mavzuning innovatsion yondashuvlarga boyligi ilmiy muhokamalarga yanada jon bag‘ishladi.

Mazkur tashrif oliy ta’lim muassasalari o‘rtasidagi ilmiy-akademik hamkorlikni mustahkamlash, zamonaviy lingvistika sohasida tajriba almashish hamda yosh tadqiqotchilar salohiyatini oshirish yo‘lida muhim qadamlardan biri bo‘ldi.