O‘zbekiston Ekologik partiyasi Surxondaryo viloyat Kengashi tashabbusi bilan Termiz davlat universitetida yoshlar o‘rtasida ekologik madaniyatni yuksaltirish, atrof-muhitni muhofaza qilishga xizmat qiluvchi innovatsion g‘oyalarni qo‘llab-quvvatlashga qaratilgan “Eko yosh ixtirochi” loyihalar tanlovi bo‘lib o‘tdi.
Unda talaba-yoshlar chiqindilarni qayta ishlash, energiya samaradorligini oshirish, yashil texnologiyalar yaratish va ekologik muammolarga amaliy yechimlar taklif etish bo‘yicha o‘z innovatsion ishlanmalarini namoyish etdilar.
Shuningdek, atrof-muhitni asrashga bag‘ishlangan “Ko‘ngil ekologiyasi” rasmlar tanlovi o‘tkazildi
Tadbirda 50 dan ortiq talabalar ishtirok etib, tabiatni asrash, suv resurslaridan oqilona foydalanish, chiqindilarni qayta ishlash va hududlarni tozalash mavzularida ijodiy ishlarini taqdim etdi.
Tanlov g‘oliblari diplom va esdalik sovg‘alari bilan taqdirlandi.
Mazkur tashabbus yoshlarning ekologik mas’uliyatini kuchaytirish va atrof-muhitni muhofaza qilish bo‘yicha ijtimoiy faolligini oshirishga xizmat qiladi.
