16-noyabr — Xalqaro bag‘rikenglik kuni munosabati bilan Termiz davlat universitetida “Ma’rifat va millatlararo bag‘rikenglik” shiori ostida “O‘zbekiston – bag‘rikeng diyor” nomli konsert dasturi tashkil etildi.
Tadbirda turli millat vakillari, yoshlar, ijodkorlar hamda jamoatchilik faollari ishtirok etib, millatlararo totuvlik, o‘zaro hurmat va do‘stlik qadriyatlarini tarannum etuvchi badiiy chiqishlar namoyish etdilar.
Sahna ko‘rinishlari, kuy-qo‘shiqlar va raqslar orqali yurtimizdagi tinchlik, ahillik va bag‘rikenglik muhitining yorqin ifodasi aks ettirildi. Ushbu tadbirlar turli millat vakillarining o‘zaro hamjihatligini mustahkamlash, yosh avlodni totuvlik ruhida tarbiyalashga xizmat qilmoqda.
Sana munosabati bilan TerDU O‘zbek filologiyasi fakulteti talabalari “Do‘stlik uyi”ga tashrif buyurishdi. Tashrif davomida ular turli millatlarning madaniyati, urf-odatlari va qadriyatlari bilan yaqindan tanishib, mamlakatimizda yaratilgan millatlararo totuvlik muhiti haqida boy tasavvurga ega bo‘ldilar.
O‘zbekistonda asrlar davomida shakllanib kelayotgan bag‘rikenglik va totuvlik qadriyatlari yoshlar tarbiyasida muhim o‘rin egallab, jamiyat barqarorligining mustahkam poydevori bo‘lib xizmat qilmoqda.
