Ayni kunlarda Oliy ta’lim, fan va innovatsiyalar vaziri Qo‘ng‘irotboy Sharipov tizimning quyi bo‘g‘ini, ayniqsa, ta’lim muassasalarini qiynayotgan muammolarini joyida hal etish hamda tuman va shahar darajasida samarali ish tashkil etish maqsadida Surxondaryo viloyatiga xizmat safarini amalga oshirmoqda.
Dastlab, Termiz davlat universitetida viloyat hokimi o‘rinbosari hamda vohadagi oliy ta’lim muassasalari mas’ullari ishtirokida uchrashuv bo‘lib o‘tdi. Unda viloyatdagi oliy o‘quv yurtlari faoliyati samaradorligini oshirish borasidagi istiqboldagi rejalar, taklif va tavsiyalar o‘rtaga tashlandi.
Shuningdek, viloyat hokimining taklifiga asosan Oltinsoy tumani maktablarida metodik ko‘mak berayotgan universitetlar tomonidan amalga oshirilgan ishlar tahlil etilib, bajarilishi lozim bo‘lgan vazifalar belgilab olindi.
Ma’lumot o‘rnida, Surxondaryo viloyatida 6 ta oliygoh bo‘lib, 110 ming nafarga yaqin talaba tahsil oladi.
