Termiz davlat universiteti olimlari samarali bo‘yoq turini yaratishdi

Avtomobil yo‘llarida harakat ishtirokchilari havfsizligini ta’minlash hamda transportlar harakatini tartibga solishda yo‘l yotiq chiziqlari muhim ahamiyatga ega. Buning uchun esa o‘z navbatida yotiq chiziqlarning ko‘rinarli holatda uzoq muddat saqlanishi zarur.

Termiz davlat universiteti olimlari tomonidan yo‘llarda yotiq chiziqlarni chizishda ishlatish uchun yangi bo‘yoq turi yaratildi. Avvalgi bo‘yoqlar xorijdan keltirilgan bo‘lib, chizilgandan keyin ikki oy muddatgacha turgan. Vohamiz olimlari yaratgan bo‘yoqlar esa xorijdan keltiriladigan bo‘yoqlardan 3 baravar arzon bo‘lib, chizilgan yotiq chiziqlar 6 oygacha saqlanib turishi bildirilmoqda.

Hozirgi kunda ushbu bo‘yoqdan sinov tariqasida Termiz davlat universiteti atrofidagi avtomobil yo‘llaridagi piyodalar yo‘lakchalarini chizishda ishlatilmoqda. Sinovlar samarali natija bersa mahsulotlarni ishlab chiqarish hamda barcha yo‘llarda foydalanish yo‘lga qo‘yiladi.

Eslatib o‘tamiz, viloyat hokimining joriy o‘quv yili boshida universitet faoliyati bilan tanishuvi chog‘ida olimlar tomonidan ushbu bo‘yoq turini yaratish jarayonlari taqdimot qilingan edi.