Tehron shahrida bo‘lib turgan Termiz davlat universiteti rektori A.Toshqulov mamlakatning yetakchi oliygohlaridan biri Alloma Tabotaboiy universiteti prezidenti bilan ham uchrashuv o‘tkazdi.
Tashkil etilgan uchrashuvda tomonlar talabalar va o‘qituvchilar almashinuvini yo‘lga qo‘yish, stajirovka, o‘quv kurslari, ilmiy konferensiya va o‘quv dasturlarini tashkil etish, ilmiy maqolalar va adabiyotlar nashr etish, mahorat darslarini tashkil etishda o‘zaro hamkorlik qilish masalalari borasida muzokara olib borishdi.
Muzokarada Alloma Tabotaboiy universiteti rahbari Termiz davlat universitetida fors tili o‘qitilishini rivojlantirish, o‘quv adabiyotlari bilan ta’minlash, onlayn kurslar tashkil etish bo‘yicha hamkorlikka tayyor ekanligini bildirdi.
Uchrashuvda ikki universitet o‘rtasida ko‘rilgan masalalar bo‘yicha hamkorlik memorandumi imzolandi.
Ma’lumot uchun: 2023-yilgi Osiyo universitetlari reytingida 143-oʻrinni egallagan mazkur ta’lim dargohida bugungi kunda 17.928 nafar talaba tahsil oladi. 1984-yilda tashkil topgan ATU Ijtimoiy gumanitar, iqtisodiyot va tibbiyot fanlariga ixtisoslashgan.
