Universitetimiz professor-o‘qituvchilari bir necha yillardan buyon Yevropa Ittifoqining Erasmus+ dasturi doirasidagi TRIGGER (Triggering innovative approaches and entrepreneurial skills for students through creating conditions for graduate’s employability in Central Asia – Markaziy Osiyoda bitiruvchilarning ishga joylashishi sharoitlarini yaratish uchun talabalarning innovativ yondashuvlari va tadbirkorlik ko‘nikmalarini yo‘lga qo‘yish) nomli qo‘shma loyihada ishtirok etib kelmoqda.
Joriy yilning 28-aprel kuni Termiz davlat universitetida loyiha doirasida navbatdagi trening seminar bo‘lib o‘tdi. Unda TRIGGER loyihasining ishchi guruhi bir qator viloyat korxonalari, universitetning karyera va akseleratsiya markazi, o‘quv-uslubiy boshqarma xodimlari hamda talabalar ishtirok etdilar.
Seminarda loyiha koordinatori M.M.Xoshimxo‘jayeva, Xorijiy filologiya fakulteti dekani A.E.Xudoyqulovlar taqdimot qilishdi. Unda asosan bitiruvchilarning kasbiy kompetensiyalarini rivojlantirish masalalari, ularning ishga joylashishlarida tadbirkorlik ko‘nikmalarining ahamiyati, bu boradagi xalqaro va milliy tajribalar haqida qiziqarli ma’lumotlar berildi.
Seminarda ishtirok etgan viloyat moliya va iqtisodiyot boshqarmasi, “Surxonsanoat qurilish” korxonasi, Surxondaryo viloyat savdo-sanoat palatasi, Yoshlar tashabbuslarini qo‘llab-quvvatlash “Yoshlar kelajagimiz” jamg‘armasi Surxondaryo viloyat filiali vakillari ham so‘zga chiqib, bugungi kunda bitiruvchilarning ishga joylashish imkoniyatlari, korxonalarda o‘quv va ishlab chiqarish amaliyotlarining borishi haqida ma’lumot berishdi.
Bizni kuzatishda davom eting!
