Kimyo fanlari doktori, professor Hasan Sharipov xotirasiga bagʻishlangan “Nodir va noyob metallar kimyosi va texnologiyasi: bugungi holati, muammolari va istiqbollari” Respublika ilmiy-amaliy konferensiyasi kunning ikkinchi yarmida kimyo fakultetida davom etdi. Unda talabalar kimyo sohasida amalga oshirilayotgan islohotlar ilmiy izlanishlar, fandagi yangiliklar bilan yaqindan tanishdilar.
Shundan soʻng, konferensiya doirasidagi uchrashuvlar axborot texnologiyalari fakultetida davom etdi. Unda yurtimizdagi nufuzli oliygohlarda faoliyat yuritayotgan professor-oʻqituvchilar maʼruzalar qilishdi.
Ilmiy-amaliy konferensiyaning ikkinchi kuni ham samimiy uchrashuvlarga boy boʻldi. Oʻzaro muloqot qilish, fikr almashish imkoniyatini bergan Yalpi majlisning navbatdagisi universitet 2-binosidagi majlislar zalida oʻtkazildi. Unda OʻzMU t.f.d., prof. S.E.Nurmanov “Fenilatsetilen bilan α-karbon kislotalar reaksiyasida metall katalizatorlarning roli”, Toshkent shahridagi Turin politexnika universiteti k.f.d., prof. O.N.Roʻzimurodov “Hydrothermal synthesis of ni-dop zinc oxide” mavzularida va qator ilmiy tadqiqot olib boryotgan yosh olimlar maʼruzalar qilishdi.
Konferensiya oʻz ishini yakunlagach, ishtirokchilar Surxondaryo viloyatining diqqatga sazavor joylari, xususan, Al-Hakim at-Termiziy maqbarasini ziyorat qilishdi. Bir soʻz bilan aytganda mazkur uchrashuv unutilmas taasurotlarga boy boʻldi.
