Oliy ta’lim, fan va innovatsiyalar vazirligi tomonidan Irrigatsiya va qishloq xo‘jaligini mexanizatsiyalash muhandislari instituti Milliy tadqiqot universitetida “AYREG – akademik reytinglar” xalqaro konferensiyasi bo‘lib o‘tdi. Unda “Times Nigher Education”, “QS”, “Webometrics” kabi dunyoning nufuzli xalqaro reyting tashkilotlari rahbarlari, Kanada, Braziliya, Germaniya, Niderlandiya, Vengriya, Ruminiya, Polsha, Xitoy, Singapur, Turkiya, Saudiya Arabistoni, Qatar, BAA, Qozog‘iston va O‘zbekiston universitetlarining rektorlari, ekspertlardan iborat jami 100 nafarga yaqin qatnashchi ishtirok etdi.
Shu jumladan, Termiz davlat universiteti rektori, professor A.Maraximov va unversitet mas’ullari ham qatnashdilar.
Tadbirda O‘zbekiston Respublikasi oliy ta’lim tizimini 2030-yilgacha rivojlantirish konsepsiyasiga muvofiq, 2026-yilga qadar mamlakatimizning 10 ta salohiyatli oliy ta’lim muassasasini QS va Times Nigher Education xalqaro reytinglariga kiritish bo‘yicha qator amaliy ishlar olib borilayotgani haqida so‘z borib, mazkur xalqaro anjuman ham bu ishlarni yanada jonlantirishga xizmat qilishi tilga olindi.
Ushbu konferensiyada universitetlararo ikki tomonlama hamkorlikni davom ettirish bo‘yicha samarali munozara, tajriba almashish va istiqbolli rejalar muhokama qilindi. Mazkur tadbir ta’lim manfaati uchun oliy ta’lim sohasidagi aloqalarimizni yanada rivojlantirish hamda ularni dunyo reytinglarida yangi o‘rinlarni egallashga xizmat qilishi bilan ahamiyatlidir.
Bizni kuzatishda davom eting!
